Форма, содржина и врачување на отказот

Отказот на договорот за вработување задолжително се изрекува во писмена форма. Работодавачот е должен писмено да го образложи откажувањето на договорот, како и да му укаже на работникот на правната заштита и да го запознае со неговите права од осигурување во случај на невработеност, согласно со закон.Отказот на договорот за вработување мора да и биде врачен на договорната страна, на која и се откажува договорот за вработување.

Согласно на ова, не може да се смета дека постои отказ доколку работодавачот или работникот само вербално ја известиле спротивната страна дека имаат намера да го прекинат работниот однос. Всушност, не постои отказ доколку не постои писмен документ предаден од една на друга страна.

Постапка за отказ во 2026 година – клучни напомени 

• Отказен рок најмалку еден месец – Работодавачот е должен да го почитува законски определениот отказен рок согласно Законот за работните односи и применливиот колективен договор. Рокот се пресметува од денот на врачувањето на писмениот отказ.
• Испратнина при отказ од деловни причини – При отказ поради деловни причини, работникот има право на испратнина чиј износ зависи од годините на работен стаж кај работодавачот, почнувајќи од минимум една нето плата до 5 години работен стаж, па се до максимални седум нето плати за над 25 години стаж.
• Рок за судска заштита – По претходно поднесен приговор кој е одбиен од страна на Работодавачот, Работникот може да поднесе тужба за поништување на незаконски отказ во рок од 15 дена од прием на одлуката по приговорот.
• Осигурување при невработеност – Работодавачот е должен да го запознае работникот со правата по основ на осигурување за невработеност при врачувањето на отказот.

Најчести прашања за отказ на договор за вработување

Може ли работодавачот да даде отказ без образложение?

Не. Работодавачот е должен писмено да го образложи отказот и да ги наведе конкретните причини, повикувајќи се на законскиот основ. Отказ без образложение или без писмена форма е незаконски и може да биде поништен во судска постапка.

Колку трае отказниот рок?

Отказниот рок зависи од видот на отказот и одредбите на договорот за вработување и колективниот договор. Минималниот законски рок изнесува еден месец.

Кога отказот е незаконски?

Отказот е незаконски кога работодавачот не може да ја докаже основаноста на причината за отказ, кога не е почитувана писмената форма, кога не е почитуван отказниот рок или кога отказот е даден на работник кој ужива посебна заштита согласно Законот за работни односи.

Дали работникот добива испратнина при отказ поради деловна причина?

Да, при отказ поради деловна причина работникот има право на испратнина. Износот се пресметува врз основа на годините стаж поминати кај работодавачот и согласно применливите одредби на Законот за работни односи и колективниот договор.

Потребна ви е правна насока?

Доколку сте добиле отказ или треба да спроведете постапка за отказ и сакате да ги разберете Вашите права, тимот на Лаличиќ и Партнери е на располагање за правна насока. Контактирајте не преку нашата веб-страница.

Напомена: Горенаведеното не претставува правен совет и во никој случај не може да биде прифатен или разбран како инструкција за постапување во конкретен случај. Секоја правна ситуација има свои карактеристики кои треба да се гледаат посебно и од таа причина Ви препорачуваме за правен совет, да контактирате стручно лице – адвокат.